PETISYON PARA TANGGALIN SA ROSTER NG KAMARA SI TEVES, INIHAIN NG MISIS NI GOVERNOR DEGAMO

Published Mar 24, 2023 02:00 PM by: NET25 News | 📷: PRESIDENTIAL COMMUNICATIONS OFFICE FB

Aaralin muna ng legal team ng House Secretary General ang request letter ni Mayor Janice Degamo ng Pamplona, Negros Oriental kung may legal na batayan ang petisyon ng naulilang maybahay ni Governor Roel Degamo na patalsikin sa Kamara si Representative Arnolfo “Arnie” Teves Jr. Ito ang inihayag ni House Secretary General Reginald Velasco kasabay ng pagkumpirma na noong Miyerkules ng hapon nila natanggap ang request letter ni Mayor Degamo. Sinabi ni Velasco na nakasaad sa liham ni Mayor Degamo ang hiling na i-expell si Negros Oriental 3rd District Representative Arnie Teves. Ayon kay Velasco, dadaan sa masusing pag-aaral ng legal team ang merito ng letter request ni Mayor Degamo. May posibilidad na ipasa ng House Secretary General office ang usapin sa House Committee on Ethics dahil sakop ng komite ang pagtalakay at paggawad ng desisyon sa mga kasapi ng Kamara.