DICT INATASAN NA KASUHAN ANG MGA SANGKOT SA ILEGAL NA PAGLILIPAT NG PONDO SA FREE WI-FI

Published May 26, 2023 02:55 PM by: NET25 News

Iniutos ni House Appropriations Committee chair at AKO BICOL Party-list Representative Elizaldy Co ang legal division ng Department of Information and Communications Technology (DICT) na sampahan ng kaso ang mga dating opisyal ng ahensya na sangkot sa paglilipat ng pondo ng free wi-fi at government data center.   Sa pagharap ng ahensya sa komite, inamin ng DICT Secretary na mayroon 11,000 wi-fi sites ang naitayo subalit 3.900 lang ang gumagana at ang pondo ay inilipat sa ibang proyekto ng nakaraang pamunuan ng departamento.   Lumalabas na ang budget pambayad sa pagpapatuloy ng subscription ay inilipat sa ibang wi-fi project.   “So kaya by December of 2021 putol po, all sites were cut because there was no contract for renewal. The funds for renewing those sites were diverted to MMDA, to so many of the other different projects which should have been used to renew the subscription so that the site will continue,” paliwanag ng kalihim   Bunga ng rebelasyon ito, tinanong ni Co kung nagsagawa na ng audit ang DICT at nagsampa ng kaso.   Tugon ni legal affairs head DICT Assistant Secretary Renato Paraiso, hindi pa sila nakapagsagawa ng full audit bagamat mayroon ng ibinabang desisyon ang Department of Justice (DOJ) na idineklara na ilegal ang ginawang paglipat ng pondo ng DICT sa programa ng MMDA.   Aminado ang opisyal na sa ngayon, hirap pa silang na magsampa ng kaso dahil sa dami ng kailangang ‘linisin’ sa DICT.   Pero diin ni Co, bilang legal consultant ng ahensya ay trabaho nilang sampahan ng kaso ang mga tiwaling opisyal at empleyado ng ahensya.   “Hindi naman pwede na they can just get away with that, yung dating administration. Kaya walang natututo sa atin…It’s juggling of funds, that’s a violation and you are the legal affairs. Hindi pwedeng maraming ginagawa, it’s part of your job description…“Isipin mo yung mga data ng agency tapos hindi rin nirenew? Dinivert din yung pera. Magaling yata yung dating OIC secretary. Balita ko maraming estafa cases yun eh,” ayon kay Co.