Pagkatapos lamang ng 1 at kalahating taon sa panunungkulan, natapos na ng administrasyon ni Pangulong Ferdinand R. Marcos Jr. ang 51 porsiyento ng target na 131,410.66 kilometro ng Farm-to-Market Road Network Program ng gobyerno sa loob ng anim na taon.

“Ikinagagalak kong ibahagi ang isang makabuluhang update sa ating Farm-to-Market Road Network program. Ang ating dapat na maging target ay 131,410.66 kilometro sa anim na taon, maaari ko nang mai-report na 51 porsiyento ng nabuo na natin,” pahayag ni Pangulong Marcos sa isang maikling video message.

Nakapagpatayo na ang gobyerno ng 67,328.92 kilometro, na 32 beses ng road trips mula Aparri hanggang Jolo, dagdag ni Marcos.

“Ito ay isang testamento sa laki ng accomplishment ng gobyerno. Ito ay hindi isang inisyatiba lamang na may kinalaman sa agrikultura, ito ay isang koneksyon sa pagitan ng lahat ng iba't ibang mga komunidad ngunit siyempre ang pangunahing layunin nito ay upang ikonekta ang mga merkado at ang mga producer--- sa ating mga sektor ng agrikultura lalo na," dagdag niya.

Tiniyak ng Pangulo sa mamamayang Pilipino na magpapatuloy ang kaniyang administrasyon hanggang sa makumpleto ang target na 131,410.66 kilometro bago matapos ang panunungkulan nito at magpapatuloy sa “Build, Better, More.”