Simula bukas, ipatutupad na ng mga local government units (LGUS) sa National Capital Region ang binagong schedule ng trabaho bilang pagsunod sa resolusyon na inaprubahan ng Metro Manila Council (MMC) para maibsan ang pagsisikip ng trapiko sa kalakhang lungsod.

Sa Navotas, nilagdaan ni Mayor John Rey Tiangco ang Executive Order No. JRT-016, ang bagong work schedule ng mga kawani, 7 a.m. hanggang 4 p.m.

Sinabi ni Tiangco na bukod sa pagtugon sa problema sa trapiko, magbibigay-daan din ito sa mga empleyado ng lokal na pamahalaan na magkaroon ng mas mahabang oras sa kanilang mga pamilya.

Aniya, exempted sa modified work schedule ang mga tauhan ng city hall na sangkot sa traffic management, emergency preparedness at response gayundin ang peace and order.

Hinikayat ni Tiangco ang mga opisyal ng barangay na maglabas ng katulad na kautusan para sa pagpapatupad ng binagong oras ng trabaho.

Sa Caloocan, ipatutupad ang bagong schedule maliban sa mga partikular na opisina na kinakailangang magsimula mula 8 a.m. hanggang 5 p.m., tulad ng business permit at licensing office, treasury department, city assessment department at public information office.

Ang mga tanggapan ng city disaster risk reduction and management office, public safety and traffic management department, city environmental management department, Caloocan City Medical Center at Caloocan City North Medical Center ay patuloy ang operasyon sa lahat ng oras upang tugunan ang pangangailangan ng mga publiko.

Inanunsyo din ng Malabon LGU na ipatutupad nila ang bagong schedule bukas.

Sa San Juan, nilagdaan ni Mayor Francis Zamora ang Executive Order No. FMZ-168 para sa implementasyon ng ibinagong oras ng trabaho para sa mga opisyal at empleyado ng lungsod.

"Kailangan nating ipakilala ang standardized working schedule para sa mga opisina ng gobyerno sa Metro Manila, lalo na sa peak hours, upang maibsan ang pagsisikip ng trapiko," sabi ni Zamora.

Itinulak ng MMC ang pagpapatupad ng bagong iskedyul ng trabaho para sa mga LGU hanggang Mayo 2 sa halip na Abril 15.