Idineklara ni Pangulong Ferdinand Marcos Jr. ang Agosto 1 ng bawat taon bilang “Araw ng Paglalathala at Pagtatanyag ng Kasarinlan ng Pilipinas” bilang paggunita sa deklarasyon ng Philippine Independence sa Bacoor Assembly.

Ang deklarasyon ay nakapaloob sa Republic Act (RA) 12073 na nilagdaan ni Pangulong Marcos noong Nobyembre 7.

Sa ilalim ng RA 12073, idineklarang special working holiday ang Agosto 1 upang gunitain sa Aug. 1, 1898 assembly sa Bacoor, Cavite kung saan nilagdaan ang Acta de Independencia ni dating Pangulong Emilio Aguinaldo, kasama ang 200 municipal leaders, na opisyal na nagpapatibay ng kalayaan ng Pilipinas mula sa mga Spaniards.

Ang Acta de Independencia ay binalangkas ni Apolinario Mabini.

Sa ilalim ng RA 12073, ang mga cultural agencies sa pangunguna ng National Commission for Culture and the Arts ay inatasan na isulong ang kahalagahan ng Aug. 1 at ang kaganapan na may kinalaman sa Bacoor Assembly noong 1898.

Inatasan naman ang Department of Education na bumuo at ipatupad ang lesson plans na nagbibigay-diin sa kaugnayan at kahalagahan ng Agosto 1.

“The State recognizes the vital role of history in fostering unity, national identity, nationalism, and nation-building. It shall ensure that historical dates and events are preserved, promoted, popularized, and made accessible to the public as part of the country’s heritage,” nakasaad sa batas.

Nilagdaan din ni Pangulong Marcos ang RA 12067, na nagdeklara sa February 24 kada taon bilang “Araw ng Sibugay” at ginawang special working holiday sa Zamboanga Sibugay province para gunitain ang foundation day nito.

Ang kopya ng RAs 12073 at 12067 ay naka-upload sa website ng Official Gazette.

Ang mga bagong batas ay magiging epektibo 15 araw pagkatapos mailathala sa Official Gazette o sa isang pahayagan na may general circulation.