Bumigay at tuluyang gumuho ang isang bahay dulot ng walang tigil na pagbuhos ng ulan noong Miyerkules sa Barangay Talamban, Cebu City.

Batay sa ulat ng Cebu Provincial Disaster Risk Reduction and Management Council, nilamon ng lupa ang bahay na matatagpuan sa Barangay Talamban dahil sa paglambot ng lupa dulot ng tuloy-tuloy na pagbuhos ng ulan.

Ayon kay Barangay Talamban Chairman Dario Arcilla, 300 katao na ang inilikas dahil sa pagbaha at paggalaw ng lupa sa lugar.

Wala namang naiulat na nasaktan o nasugatan sa insidente.

Ang pagbuhos ng ulan sa lugar ay bunsod ng masamang panahon dala ng hanging habagat.