Iniulat ng Philippine Statistics Authority (PSA) na bumaba ang bilang ng mga mahihirap na Pilipino noong 2023.

Ayon sa Full Year Official Poverty Statistics ng PSA, ang bilang ng mahihirap na Pilipino ay bumaba sa 17.54 milyon mula sa 19.90 milyon noong 2021.

Naitala ang poverty incidence sa 15.5% noong 2023 mula sa dating 18.1% noong 2021.

Dagdag ng PSA, sa 18 rehiyon, 11 ang nakapagtala ng pagbaba sa poverty incidence sa mga pamilya. Nagpakita ng improvement ang Caraga sa 14.9% o pagbaba ng 11% points.

Ayon kay National Statistician and Civil Registrar General Usec. Claire Dennis Mapa, bumaba ang bilang ng mahihirap dahil sa pagtaas ng sahod at employment rate bunsod ng paglago ng ekonomiya.

“Mas mataas ang kita, mas mabilis ang taas ng kita doon sa mga pamilya sa bottom decile,” paliwanag ni Mapa.

Para maituring na mahirap, ang isang tao ay dapat na "below the country’s poverty threshold."

Para sa 2023, ang average poverty threshold ay P13,873 kada buwan para sa pamilyang may limang miyembro. Ibig sabihin, ang pamilya na 'above' sa nasabing halaga ay hindi itinuturing na mahirap. Ang halaga ay budget para sa food at non-food items.

Para sa food-poor threshold, ang average ay P9,581 kada buwan para sa pamilyang may limang miyembro.

Sinabi ng PSA at NEDA na rerebisahin nila ang poverty threshold information sa susunod na taon para mas maayos na maipakita ang kalagayan ng bansa.