Malaki ang posibilidad na bukod kay dating Pangulo Rodrigo Duterte ay dalawang ex-Philippine National Police (PNP) chiefs ang unang aarestuhin sa bisa ng warrant of arrests na ilalabas ng International Criminal Court (ICC).

Ipinahiwatig ito ni Atty. Maria Kristina Conti, ICC Assistant to Counsel, at inamin na bukod kay Duterte ay kabilang sa aarestuhin ng ICC sina dating PNP Chief Oscar Albayalde at Ronald Dela Rosa.

Ang warrant of arrests na sinasabing ilalabas sa susunod na buwan ng ICC ay may kinalaman sa imbestigasyon sa drug war campaign sa loob ng 6 taon na administrasyon ni Duterte.

Si Dela Rosa ay posibleng mapasama dahil siya ang pumirma sa memorandum ng drug war program ni Duterte at ang partisipasyon ni Albayalde ay dahil siya ang sumunod na hepe ng PNP at ipinagpatuloy ang kampanya.

Matatandaan na pagkatapos ng termino ni Dela Rosa bilang PNP Chief ay sumabak ito sa pulitika at nanalo bilang senador noong 2019 midterm elections kung saan nakakuha ng 19 milyon na boto.

Si Dela Rosa ang tumatayong chairman ng Senate Committee on Public Order and Dangerous Drugs.

Ayon kay Conti, ang tatlo ay nabanggit sa paunang imbestigasyon na isinampa at tinanggap ng ICC sa filed drug war deaths.

Paliwanag ni Conti, may posibilidad na ang warrant ay ilabas sa mga taong malaki ang responsibilidad o ang may kapasidad na ituloy ang krimen.

Idinagdag pa ni Conti na ang imbestigasyon ng ICC ay susuri sa pagkakasangkot ng mga opisyal ng pulisya hanggang sa “mid-level” hierarchy ng PNP.