Napag-alaman ng National Bureau of Investigation (NBI) na tumugma ang fingerprints ng kapatid ni suspended Bamban Mayor Alice Guo na si Wesley Leal Guo, sa fingerprints ng Chinese citizen na si Guo Xiang Dan, ayon kay Senator Sherwin Gatchalian.

"Si Guo Xiang Dian ay si Wesley Leal Guo. Ito ay ayon sa fingerprint matching ng NBI gamit ang BOI (Board of Investments) records at ang NBI biometric records," mensahe ni Gatchalian sa mga mamamahayag.

Inilabas ni Gatchalian sa media nitong Martes ang mga kopya ng Philippine passport ni Wesley at Chinese passport ni Guo Xiang Dan mula sa Special Investor's Resident Visa (SIRV) ng pamilya Guo.

Ayon sa senador, dumating si Guo Xiang Dan sa Pilipinas noong 1999 at nakalista bilang dependent son ni Lin Wen Yi.

Si Lin Wen Yi ay ang rehistradong ina ni Guo Hua Ping sa kanyang SIRV. Kinumpirma na ng NBI na sina Guo Hua Ping at Mayor Alice Guo ay iisang tao.

"He's listed as the dependent son of Lin Wen Yi which made him Guo Hua Ping's brother. Wesley Leal Guo is an incorporator of CDAG Reality Corporation which Alice Guo is the majority owner," dagdag pa ng senador.

Nang maglaon, ibinunyag din ni Gatchalian na si Guo Xiang Dian ay may kasalukuyang Chinese passport na mag-e-expire sa 2025.

Parehas aniyang ginagamit ni Guo Xiang Dian ang Philippine at Chinese passport nito mula 2003.

Muling iginiit ni Gatchalian na inabuso ng pamilyang Guo ang late registration process para sabihing sila ay mga Pilipino.

Si Mayor Guo, ang kanyang ama, si Jian Zhong Guo, ang kanyang pinaghihinalaang biyolohikal na ina na si Lin WenYi, at mga kapatid na sina Shiela, Seimen at Wesley ay pina-subpoena din para dumalo sa imbestigasyon ng Senado sa ni-raid na POGO hub sa Bamban, Tarlac.

Nanawagan din si Gatchalian sa mga awtoridad na ipagpatuloy ang imbestigasyon sa pagkakaroon ng dalawang Alice Guos.

Sa isa sa mga paSenate hearing, sinabi ng PSA na inendorso na nito ang pagkansela ng certificate of live birth ni Mayor Guo matapos malaman na "irregular" ang proseso ng kanyang birth registration.

Si Guo ay nasa sentro ng imbestigasyon ng Senado sa ni-raid na POGO hub sa Bamban matapos makita ng ilang dokumento na personal siyang sangkot sa pagproseso ng mga dokumento para sa operasyon nito.

Paulit-ulit niyang itinanggi ang pagiging isang mamamayang Tsino, at sinabing siya ay isang Pilipino na ipinanganak ng isang ama na Intsik at isang ina na Pilipino.