Inamin ngayon ng Department of the Interior and Local Government (DILG) na hindi lang ang Captain's Peak resort ang iniimbestigahan ng ahensya kundi ang iba pang establisimyento sa buong bisinidad ng Chocolate Hills.

Inihayag ito ni DILG Secretary Benjamin Abalos Jr. kasabay ng pag-amin na masama ang loob niya sa nangyayari sa Chocolate Hills na itinuturing na priceless natural resources ng Pilipinas at idineklarang UNESCO National Geological Monument.

Isiniwalat ni Abalos na ipapatawag niya si Mayor Restituto Suarez III ng Sagbayan, Bohol para hingan ng paliwanag sa insidente bukod pa utos na magsumite ng mga dokumento hinggil dito.

Ang Chocolate Hills ay matatagpuan sa mga bayan ng Sagbayan, Carmen at Batuan sa probinsya ng Bohol at ito ay binubuo ng 1,776 burol na magkakapareho ng hugis.

Tuwing tag-araw, ang mga berdeng damo na tumutubo sa mga burol ay natutuyo at nagiging kulay chocolate brown.

Tiniyak ni Abalos na kapag napatunayan sa imbestigasyon na walang kasalanan ang local official ay walang problema sa kanya subalit kung may pananagutan sa usapin ay sasampahan ng kaso sa Office of the Ombudsman.

Una nang bumuo ng special task force ang DILG para imbestigahan kung paano naitayo ang resort at iba pang istruktura sa loob ng UNESCO heritage site.

Inanunsyo na rin ng Ombudsman ang isasagawa na imbestigasyon sa isyu at tiwala itong mapapasakamay kaagad ang pangalan o kung sinong ahensya at mga opisyal ang nag isyu ng business at building permits para maitayo ang naturang resort sa Chocolate Hills para sa case build up.