Inaprubahan ni Pangulong Ferdinand Marcos Jr. na simulang ibalik ang school calendar sa bansa sa 'traditional arrangement.'

Ang pagbubukas ng mga klase para sa school year 2024-2025 ay magsisimula sa Hulyo 29 ngayong taon at matatapos sa Abril 15, 2025.

Sisimulan na nito ang unti-unting pagbabalik ng school year sa Hunyo ng bawat taon hanggang sa Marso sa susunod na taon.

Nagpulong sina Pangulong Marcos at Vice President at Education Secretary Sara Duterte sa Malakanyang upang talakayin ang dalawang opsyon para sa implementasyon ng School Year (SY) 2024-2025 calendar.

Sa sectoral meeting, sinabi ng Pangulo sa Department of Education (DepEd) na simulan ang pagbabalik ng standard school calendar days simula SY 2024 hanggang 2025.

Iprinesenta ni Vice President Duterte ang dalawang opsyon sa Pangulo para sa school calendar shift.

Ang unang opsyon ay binubuo ng 180 school days na may 15 in-person Saturday classes habang ang pangalawang opsyon naman ay magkaroon ng 165 school days na walang in-person Saturday classes. Ang parehong opsyon ay matatapos ang school year sa Marso 31, 2025.

Ngunit sinabi ng Pangulo na ang 165-day school calendar ay “too short" dahil mababawasan sa nasabing arrangement ang bilang ng school days at contact time na maaaring makompromiso ang mga resulta ng pag-aaral.

Hindi rin nais ng Pangulo na pumapasok ang mga estudyante sa eskuwelahan tuwing Sabado para kumpletuhin ang 180-day school calendar dahil "it will jeopardize their well-being and demand more resources."

Bilang kompromiso, sinabi ni Marcos na sa halip na magtapos sa Marso 31, 2025, dapat i-adjust ng DepEd ang SY upang matapos sa Abril 15, 2025 at makumpleto ng mga estudyante ang 180 days ng hindi gagamitin ang Sabado para pumasok sa eskwelahan.

“Habaan lang natin ‘yung school days. Para matagal, dagdagan na lang natin ‘yung school days basta huwag natin galawin ‘yung Saturday. So, school day will remain the same. Standard lang,” sinabi ni Pangulong Marcos kay VP Duterte.

Sinabi ni Duterte na nakonsulta na nila ang mga guro, school officials, at mga magulang tungkol sa panukalang school calendar.