Pinayagan ng Department of Justice (DOJ) ang pagbibigay ng visa relief sa mga dayuhang na-stranded sa Pilipinas dahil sa patuloy na kaguluhan sa Middle East.

Iniutos ni DOJ Sec. Frederick Vida sa Bureau of Immigration (BI) na pahabain ang pananatili sa bansa ng mga foreign national na naapektuhan ng malawakang pagkansela ng mga outbound flights na kaugnay ng nagaganap na hostilities sa Middle East.

Sa ilalim ng Department Order No. 159, series of 2026 na inilabas noong March 9, pinapayagan ang mga dayuhang nag-expire ang visa noong February 28, 2026 na manatili sa Pilipinas hanggang April 1, 2026.

Hindi na rin sila sisingilin ng anumang bayarin, multa, o penalty habang ipinatutupad ang nasabing visa extension.

Giit ng DOJ, ipinapakita ng hakbang na ito ang patuloy na paninindigan ng bansa sa pagbibigay ng humanitarian support sa panahon ng global crisis. | via Earlo Bringas