BULACAN — Ngayong Linggo, Abril 19, 2026, ibang level na eksena ang hatid ng NET25 Summer Blast 2026. Sa unang pagkakataon, sabay na gagamitin ang Philippine Arena at Philippine Sports Stadium sa Ciudad de Victoria, Bocaue.

Ibig sabihin—dalawang venues, mas maraming audience, doble ang masaya, at doble rin ang umaapaw na energy kaya isa ito sa pinakaabangang live events ng taon-taon.

Simple Beginnings

Nagsimula ang Summer Blast bilang isang simpleng pasasalamat ng NET25 sa kanilang audience. Noong 2023, sa Philippine Sports Stadium pa lamang ito ginanap. Pero dahil sa malakas na turnout at patuloy na suporta, mabilis itong naging isang annual summer event.

Ngayon, level up na—pumasok na rin ito sa Philippine Arena, ang pinakamalaking indoor arena sa mundo.

Mas malawak na espasyo, mas maraming tao, at mas matinding karanasan ang naghihintay sa mga dadalo.

Solid Lineup ng OPM Artists

Hindi magpapahuli ang lineup ngayong taon, tampok ang ilan sa pinakamalalaking pangalan sa OPM.

Headliner ang IV of Spades na inaasahang magdadala ng crowd-favorite hist nilang mga kanta, kasama ang rap icon na si Gloc-9 at ang high-energy performer na si Billy Crawford.

WEBSITE NET25 - 2026-04-20T202306.259.png

Para sa alt-rock fans, handa ring maghatid ng nostalgia ang Mayonnaise at Silent Sanctuary.

Samantala, representative naman ng new generation ng OPM sina Zack Tabudlo, Nobita, at Dilaw.

Magdadagdag pa ng saya sa concert ang P-pop group na BGYO, kasama ang mga rising acts tulad nina Angela Ken, Sugarcane, Over October, Khel Pangilinan, at Jumanji.

Paalala sa Publiko at Daloy ng Trapiko

Dahil sa inaasahang malaking crowd mula 6:00 a.m. hanggang 10:00 p.m., naglabasd ng advisory ang NLEX Corporation.

Pinapayuhan ang mga motorista na tiyaking may sapat na load ang kanilang RFID upang maiwasan ang abala sa mga toll plaza. Inirerekomenda ang paggamit ng Ciudad de Victoria exit para sa mas diretsong biyahe patungo sa venue.

Para naman sa mga biyaheng patungong Bocaue o Santa Maria, hinihikayat ang paggamit ng alternatibong ruta gaya ng Marilao, Bocaue, o Tambubong exits upang maiwasan ang mabigat na daloy ng trapiko.

Magkakaroon din ng sapat na traffic personnel sa mga pangunahing lugar upang tiyakin ang maayos at tuloy-tuloy na daloy ng sasakyan sa buong araw ng Summer Blast 2026.