Nanawagan si dating Pangulong Rodrigo Duterte sa mga Pilipino na manalangin para sa kapayapaan at katarungan habang kinondena nito ang Philippine National Police (PNP) dahil umano sa pang-aabuso at pagbalewala sa karapatan ng mga tao sa patuloy nitong paghahanap sa televangelist at Kingdom of Jesus Christ (KOJC) leader na si Apollo Quiboloy sa 30-ektaryang compound ng grupo sa Davao City.

Samantala, naglabas kahapon ng pahayag si Bise Presidente Sara Duterte na humihingi ng tawad sa mga miyembro ng KOJC sa paghimok sa kanila na iboto si Pangulong Marcos sa 2022 elections.

Tinawag ni VP Sara Duterte ang raid na pagtataksil sa tiwala ng publiko at isang paglabag sa mga karapatan ng konstitusyon.

Bagama't hindi siya tutol sa anumang legal na pagpapatupad ng mga warrant of arrest, hindi katanggap-tanggap ang paggamit ng karahasan laban sa mga inosenteng sibilyan.

Mahigit 2,000 pulis na suportado ng mga riot squad ang lumusob sa 30-ektaryang compound ni Quiboloy sa Davao noong Sabado, na tahanan din ng ilan sa kaniyang mga tagasunod.

Libu-libong pulis – sa pangunguna ni Police Regional Office 11 (PRO 11) chief Brig. Gen. Nicolas Torre III – ipinagpatuloy ang kanilang operasyon kahapon ng madaling araw para isilbi ang warrant of arrest laban kay Quiboloy na pinaniniwalaang nagtatago pa rin sa loob ng KOJC compound.

Sinabi ni Torre ng PRO 11 na nasa 10 lamang ang kanilang saklaw sa mahigit 40 istruktura na dapat nilang hahanapin sa pagtatangkang isilbi ang warrant of arrest laban kay Quiboloy at sa kaniyang mga assistant na sina Ingrid Canada, Inting Canada at Jacklyn Roy.

Aniya, tiyak na nasa loob pa rin ng compound si Quiboloy, kung saan makikita ang KOJC Cathedral, Jose Maria College, Apollo Air Hangar, opisina at studio ng Sonshine Media Network Inc., Bible school at ang mga dormitoryo para sa daan-daang full-time na nagtatrabaho sa KOJC.