Hinimok ni Pangulong Ferdinand Marcos Jr. ang mga Pilipino na tulungan ang administrasyon na makamit ang minimithi nitong "Bagong Pilipinas."

Sa kanyang bagong vlog, binigyang-diin ng Pangulo ang mahalagang papel ng mga Pilipino sa Bagong Pilipinas na itinataguyod ng kanyang administrasyon.

Hinikayat ni Marcos ang mga Pilipino na magsikap na tuparin ang kani-kanilang New Year’s resolution. Aniya, tulad ng maraming Pilipino, siya rin ay may New Year's resolution.

Kabilang aniya sa kanyang New Year's resolution ang paggugol ng mas maraming oras sa kanyang pamilya, panatilihin ang magandang kalusugan, at pagkakaroon ng regular na ehersisyo upang mabawasan ang stress para sa mas malakas na immunity.

“Pero siyempre, nangingibabaw sa ating New Year’s resolution ang mga mithiin natin sa bayan dahil marami pang kailangang gawin, marami pang kailangan pagandahin, at marami pang kailangan ayusin para naman tuluy-tuloy ang pagsulong natin tungo sa isang Bagong Pilipinas,” ayon sa Pangulo.

Aniya, ang pagkakasama ng indibidwal at komunidad ay kailangan para makamit ang nilalayon ng administrasyon.

Sinabi ni Marcos na bukod sa gobyerno, titiyakin niya, sa tulong ng mga Pilipino, na ang Bagong Pilipinas ay makakamit ng bansa sa pamamagitan ng “Bagong Pilipino.”

"Filipinos could start with themselves and their families by observing punctuality, being more productive in their work, and spending prudently," ayon sa Pangulo.

Hinimok nito ang mga Pilipino na paghusayin at i-develop ang kanilang sarili sa pamamagitan ng pagbabasa ng libro, pag-aaral ng bagong teknolohiya, obserbahan ang personal grooming at self-discipline, at maging mabuting mamamayan at miyembro ng pamilya.

Habang ipinagdiriwang ng bansa ang Community Development Day, sinabi ng Pangulo na isa itong paalala sa kahalagahan na pagpapabuti at pagpapaunlad ng mga lokal na komunidad.

“Sa mga susunod na linggo ay lalo niyo pang mauunawaan at mararamdaman ang ibig sabihin ng Bagong Pilipinas," aniya.

“Papaigtingin natin ang paghihikayat sa lahat na maging bahagi ng pagpapaganda ng ating barangay, siyudad, probinsiya, at ng buong bansa. Dahil walang Bagong Pilipinas kung walang Bagong Pilipino," ayon sa Pangulo.