Simula 2020, mayroon nang 19,268 Yellow Card holders sa Makati ang nabigyan ng libre at unlimited na dialysis na umabot na sa 166,677 sessions, ayon kay Mayora Abby Binay.

Paliwanag ng alkalde, sinasagot ng lungsod ang anumang balanse mula sa PhilHealth coverage kaya’t wala nang binabayaran ang mga pasyenteng may Yellow Card.

Aniya, higit sa lahat ay prayoridad ng Makati ang kalusugan ng mga mamamayan. Kaya’t layon ng unlimited dialysis program na tiyaking walang residente ang mapagkakaitan ng kinakailangang pangangalaga dahil sa kakapusan sa pera.

Sa Ospital ng Makati (OsMak) na nasa pamamahala ng lungsod, ang isang dialysis session para sa non-Yellow Card holders at non-residents ay may bayad mula P4,130 hanggang P5,560. Ang mga presyong ito sa OsMak ay mas mababa sa mga private clinic at hospital.

Samantala, hanggang P2,600 per session lamang ang sinasagot ng PhilHealth, kaya’t madalas na nagiging financial burden sa mga pasyente at kanilang kaanak ang pagsagot sa balanse.

Nakikita sa ganitong sitwasyon ang kahalagahan ng Yellow Card, na kilala rin sa tawag na Makati Health Plus Card, dahil binabawasan nito ang pasanin ng mga pasyente na nangangailangan ng dialysis.

Sa kasalukuyan, nagbibigay din ng libreng chemotherapy sessions ang lungsod sa cancer patients sa OsMak, libreng maintenance medicines, konsultasyon, at laboratory procedures sa ilalim ng Yellow Card.

Bukas din ang mga health center ng lungsod para sa non-Yellow Card holders at non-Makati residents upang magbigay ng libreng konsultasyon at reseta ng mga gamot.