Nagpahayag ng pasasalamat ang provincial government ng Pampanga kay Makati Mayor Abby Binay nitong Biyernes para sa P1 milyong donasyon ng lungsod bilang pagsuporta sa pagbangon ng probinsya na sinalanta ng bagyong Egay at Falcon noong 2023.

Iginawad ni Pampanga Governor Dennis Pineda ang isang Certificate of Appreciation sa alkalde sa ginanap na Provincial Disaster Risk Reduction and Management Council Meeting sa Kingsborough International Convention Center sa bayan.

Ayon kay Mayor Abby, ikinagagalak niyang makapagbahagi ng tulong ang Makati sa ibang mga lokalidad upang mapabilis ang kanilang pagbangon at maging mas maginhawa ang buhay ng kanilang mamamayan.

Kasama sina dating Pangulo at kasalukuyang Pampanga Representative Gloria Macapagal-Arroyo at dating Representative Mikey Arroyo, binisita ni Mayor Abby ang mga bayan ng Sta. Rita, Porac, Floridablanca, Lubao at Guagua. Sinalubong siya ng mainit na pagtanggap ng mga mayor at iba pang lokal na opisyal at mga kawani

Inimbitahan din ni Mayor Abby ang mga naturang lokalidad na pumasyal sa Makati para sa benchmarking activities. Aniya, sa harap ng kumplikado at matitinding hamon ng climate change, kailangan nilang local leaders na magkaisa at magtulungan upang maitaguyod ang mas matatag na at masaganang kinabukasan para sa mga kababayan.

Aniya pa, bilang certified resilience hub sa Southeast Asia, nakahanda ang Makati na makipag-ugnayan sa kapwa LGUs upang maibahagi ang mga subok nang best practices at digital innovations para sa climate change adaptation and mitigation.