Pangungunahan ng Iglesia Ni Cristo ang isang “National Rally for Peace” sa darating na Enero 13, sa Quirino Grandstand sa Maynila. Libu-libong Pilipino mula sa Metro Manila, CALABARZON, at MIMAROPA ang magtitipon-tipon sa isang malawakang pagpapahayag ng pagkakaisa at kapayapaan para sa bayan.

Kasabay nito, isasagawa rin ang rally ng mga kaanib sa Iglesia Ni Cristo sa iba’t ibang panig ng bansa, kabilang ang Legazpi City (Albay), City of Ilagan (Isabela), Bantay, Ilocos Sur, at Puerto Princesa City (Palawan), sa Luzon; sa Visayas, Cebu City, Bacolod City, Iloilo City at Ormoc City; at sa Davao City, Pagadian City, Butuan City, at Cagayan de Oro Citysa Mindanao.

Paninindigan Para sa Kapayapaan at Kaunlaran

Layon ng rally ay ipahayag ang pagsuporta sa sinabi ni Pangulong Bongbong Marcos na unahin ang kapakanan ng bayan at mapanatili ang kapayapaan.

"Hindi ito mahalaga. Wala itong magagawang pagbabago sa buhay ng kahit isang Pilipino, kaya bakit ito pag-aaksayahan ng oras? Anong mangyayari … kung may maghahain ng impeachment? Matatali ang Kongreso, matatali ang Senado. Para ano? … Wala itong maitutulong para mapaunlad ni isang buhay ng Pilipino," sabi ng Pangulo.

Mas Malaking Venue

Binalak na isagawa ang rally sa Quirino Grandstand subalit hindi agad napahintulutan ng National Parks Development Committee dahil sa conflict of schedule sa venue. Kalaunan, pinahintulutan din ng ahensya ang “Rally for Peace” na gawin sa Quirino Grandstand matapos nitong maisaayos ang schedule of events sa nasabing dako. Ayon kay NPDC Executive Director Cecille Lorenzana-Romero, sinusuportahan nila ang layunin ng aktibidad.

Bukas Para sa Lahat

Bagamat pinangungunahan ng INC, bukas ang rally para sa mga hindi miyembro nito na sang-ayon sa layunin ng aktibidad na itaguyod ang kapayapaan at pagkakaisa at handang sumunod sa mga patakarang ipatutupad ng INC.

Abangan ang mga kaganapan ng aktibidad na ito sa "National Rally for Peace: A NET25 Special Coverage" at sa iba pang mga programa ng NET25 at mga official social media pages nito."