No. 1 most wanted sa Palawan, arestado sa 19 kaso ng sekswal na pang-aabuso

Arestado ang isang suspek sa qualified rape at sexual abuse sa Taytay, Palawan, noong Marso 24.

Batay sa imbestigasyon, noong Mayo 20, 2024, inanyayahan umano ng suspek ang dalawang batang babae na may edad 10 at 8 upang pumunta sa isang masukal na lugar, kung saan niya umano sila ginahasa at inabuso. Paulit-ulit umanong naganap ang panghahalay sa parehong mga biktima noong Mayo 30, Hunyo 4, at Hunyo 29, 2024, sa parehong lugar.

Ayon sa pulisya, ang suspek ay itinuturing na No.1 Most Wanted Person ng Palawan at may kinakaharap na 19 kaso, kabilang ang siyam na kaso ng Statutory Rape by Sexual Assault sa ilalim ng Article 266-A(2) ng Revised Penal Code, pitong kaso ng Acts of Lasciviousness na may kaugnayan sa RA 7610 o Child Abuse Law, at dalawang kaso ng Qualified Rape of a Minor batay sa binagong probisyon ng RA 11648. Wala ring inirekomendang piyansa para sa kaniyang paglaya.

📷: CIDG