Inamin ng National Security Council (NSC) na palaisipan sa konseho kung saan ang nagmula ang underwater drone na nalambat ng mga mangingisda sa baybayin ng San Pascual, Masbate.

“It could have come from anywhere. Kaya ang ginagawa natin ngayon ay dine-determine natin yung drone na ito. Saan ba ito nanggaling? Ano yung mga specifics nito? Ano yung mga namonitor nating mga vessels na dumaan diyan sa lugar na ‘yan? Para ma-determine natin kung saan talaga nanggaling,” pahayag ni NSC spokesperson Jonathan Malaya sa Bagong Pilipinas Ngayon.

“As of now, ang imbestigasyon ng Armed Forces of the Philippines (AFP) ay ongoing pa at hindi pa natin masasabi kung ang drone na ito ay nanggaling sa isang partikular na bansa,” paglilinaw ni Malaya.

Noong December 30, 2024, natuklasan ng mga mangingisda sa karagatan sakop ng Barangay Iniwaran sa bayan ng San Pascual ang 2.72-meter-long drone na lumulutang sa dagat.

Kaagad na ipinaalam ng mga mangingisda sa explosive ordnance disposal team ng Bicol Region Police ang nasabing device na may Chinese markings.

Sa inisyal na pagsusuri ng pulisya, nakumpirma na hindi explosive device ang narekober ng mga mangingisda kundi isang uri ng underwater navigation drone communication system.”

“Itong drone na ito is used for reconnaissance and surveillance, so it’s imperative for the Philippines to determine kung saan ito nanggaling at kung ano ang ginagawa nito sa ating archipelagic waters,” dagdag na pahayag ng NSC.

Sa ngayon ay nakikipag-ugnayan na ang NSC sa international counterparts para mangalap ng karagdagang impormasyon ukol sa submarine drone.

“Kasi kung lalabas dito na it comes from a certain country at ang ginagawa niya ay illegal, we can say and make a conclusion,” pag-amin ni Malaya ng tanungin kung ang drone ay maaaring lumabag sa Philippine territorial laws.

Binigyang diin din nito ang alalahanin hinggil sa lokasyon kung saan narekober ang drone.

“Kasi ang nakakabahala nito ay more or less nasa archipelagic waters ng ating bansa, kasi nasa loob siya, nasa Masbate area siya,” paglalahad ni Malaya.