Nagkasundo ang United States at Pilipinas na palakasin ang koordinasyon ng dalawang bansa, sumunod at irespeto ang batas sa ilalim ng United Nations Convention on the Law of the Sea (UNCLOS).

Ang kasunduan ay pinagtibay ng dalawang bansa sa katatapos na US-Philippines 3+3 Senior Officials’ Meeting na pinangunahan ni Deputy Secretary of State Kurt Campbell.

Dumalo sa nasabing pulong ang senior U.S at Philippines officials mula sa Department of State, Department of Defense at National Security Council ng dalawang bansa na ginanap sa Washington, D.C. sa Estados Unidos.

Pagsusog ang 3+3 meeting sa US-Philippines Bilateral Strategic Dialogue noong April 22 at 23, 2024 gayundin ang bilateral meeting nina Pangulong Marcos at US President Joe Biden sa sidelines ng Trilateral Leaders' Summit noong nakalipas na April 11 at ang U.S.-Philippines 3+3 Ministerial noong April 12.

Sa media note na inilabas ng US Department of State, nakasaad na tinalakay sa U.S - Philippines 3+3 Senior Officials’ Meeting ang mga naging bunga o outcomes sa nagdaang pagpupulong ng mga lider ng bansa at kung paano maipagpapatuloy ang kaayusan sa Indo-Pacific region.

Napag-usapan din ang pagpapalakas ng koordinasyon ng bawat bansa upang maharap ang mga hamon sa mga pinag-aagawan na teritoryo at ang pagpapasigla ng economic cooperation and resilience.

Nagkasundo ang dalawang panig na higit pang palakasin ang pandaigdigang suporta para maipatupad ang pagrespeto at pagtalima sa UNCLOS.