Sisimulan na ngayong araw ng Land Transportation Office (LTO) ang pamamahagi ng plastic driver’s license sa buong bansa, ito ang kinumpirma ni LTO chief Vigor Mendoza II.

Nasa 600,000 plastic cards ang na-deliver sa LTO, ani Mendoza. Aniya, sapat ito para malunasan ang backlog sa cards.

Inaasahan din darating ang karagdagang 9.7 milyong plastic cards sa susunod na mga buwan.

Sa ibang bahagi ng bansa, sinimulan na ang pamamahagi ng plastic cards at sa araw ng Martes sa Metro Manila

Bukod sa isang milyong plastic cards, mayroon pang 6.5 milyon ang inaasahang ipapadala ng supplier.

Paliwanag ni Mendoza, kinakailangan ng LTO ng 550,000 hanggang 600,000 cards kada buwan at sa mga darating na cards, sapat ito para matapos ang backlog noong nakaraang taon at sapat para sa supply ngayong 2024.

Pinaalalahanan ng LTO ang publiko sa renewal schedules na inilabas ng ahensya para mapabilis ang pagbibigay ng mga plastic card license.

Ang mga lisensya na nag-expire mula Abril 1 hanggang Agosto 31, 2023 at mag-expire mula Abril 1 hanggang 30 ngayong taon ay dapat na i-renew mula Abril 15 hanggang 30 upang maiwasan ang mga multa, ayon sa LTO.

Ang mga motoristang may expire na lisensya mula Setyembre 1 hanggang Disyembre 31, 2023, at mula Mayo 1 hanggang 31, 2024 ay nakatakdang mag-renew sa Mayo.

Ang mga lisensya na nag-expire mula Enero 1 hanggang Marso 31 at Hunyo 1 hanggang 30 ay nakatakdang i-renew sa Hunyo.