Iginiit ng Malacañang na hindi balat-sibuyas si Pangulong Ferdinand Marcos Jr. sa gitna ng batikos na tinatanggap kasunod ng pag-aresto kay dating Pangulong Rodrigo Duterte dahil sa crimes against humanity.

Sa press briefing sa Malacañang, nilinaw ni Palace Press Officer at Presidential Communications Office Undersecretary Claire Castro ang pagkakaiba ng free speech at inciting to rebellion o sedition dahil may mga isinasagawang pagtitipon upang ipakita ang suporta kay Duterte.

''As we can say, the president is not onion skinned, okay. Usually po, hindi po siya nadadala ng ganyan pero kapag po nandoon na po iyong elemento ng inciting to sedition which is of course without any tumultuous uprising but they are encouraging people to sow hatred to the government, to the President then we have to step up,'' paliwanag ni Castro.

Tiniyak ni Castro na agad na maghahain ng kaso o reklamo ang gobyerno kung kinakailangan.

"But as of the moment, there is no indication on the part of the President that he will do that,'' dagdag na pahayag ng Palace Press Officer.

Aminado si Castro na normal ang mga protest actions na ginagawa upang maipakita ang suporta kay Duterte kaya hindi pipigilan ng gobyerno ang mga ito. Gayunman, kailangan ang mga protest actions ay hindi nakakaalarma.

''Hindi po natin mawawala sa kanilang damdamin, iyan po ay normal dahil mayroon pong naging pangyayari sa kanilang malamang iniidolo at panatiko po sila ng isang leader,'' ayon kay Castro.

''Hindi po natin pipigilan ang pagsasabi ng kanilang mga damdamin huwag lang po sigurong lalagpas na magkakaroon po ng alarma at masasabi po natin na iyan po ay sedition or inciting to sedition na po,'' dagdag na paliwanag ng opisyal.

Nagsagawa ng rally noong Linggo, Marso 16, sa Davao City upang ipakita ang suporta kay dating Pangulong Duterte, na nakakulong sa International Criminal Court (ICC) sa The Hague, Netherlands.

Mahigit 30,000 supporter’s ng dating Pangulo ang nagtipon para sa isang solidarity walk bilang pagtutol sa kanyang pag-aresto kaugnay sa umano’y kasong crimes against humanity.

Noong Linggo, inihayag ng pambansang pulisya na nakabantay ang kanilang hanay sa mga aktibidad na ginagawa ng mga supporter ni Duterte, sabay sabing naging maayos ang rally at walang naitalang major untoward incidents.

Kahapon, nagsimula ang rally sa isang motorcade sa iba't ibang lugar sa Metro Manila, sinundan ito ng vigil at interfaith prayer.