Namahagi si Pangulong Ferdinand Marcos Jr. ng 1,287 Certificates of Land Ownership Award (CLOA) at e-titles sa 1,270 Agrarian Reform Beneficiaries (ARBs) sa Coron, Palawan.

Itinurn-over din ni Pangulong Marcos ang tatlong farm-to-market road projects (FMRs) sa lalawigan.

Sa kanyang talumpati, sinabi ng Pangulo na ang agriculture sector sa Palawan ay isa sa mga "key areas" na ipinangako ng administrasyon na pagbubutihin.

“At ang yaman pong ito ay hangad nating mapalago nang umunlad pa ang sektor ng agrikultura dito sa region ninyo,” sinabi ni Marcos sa distribusyon ng CLOAs at FMRs na ginanap sa Old Coron Gymnasium.

Sinabi ng Pangulo na ang pamamahagi ng mga CLOA at e-title ay commitment ng administrasyon na palayain ang mga benepisyaryo mula sa pagkakautang.

"Hindi na kayo dapat mag-alala, sa inyo na ang lupa," anunsyo ng Pangulo.

Nangako ang Pangulo na iprayoridad ang agriculture graduates sa land distribution.

Samantala, binigyang-diin ni Presidential Communications Office Assistant Secretary Joey Villarama ang kahalagahan na isama ang mga 'future farmer' sa programa.

"Ang pagbibigay ng titulo ng sakahan sa mga graduate na agriculture-related courses ay paghikayat sa mga kabataan sa pagpasok sa pagsasaka para sa ating food sufficiency," sinabi ni Villarama.

Ayon kay Villarama, ang land distribution ay isa ring paraan para isama ang mga dating rebelde sa food production.

"Alam naman natin na ang mga namundok ang dahilan nila kung bakit sila namundok kasi wala silang sariling lupang sakahan. Paghikayat ito sa iba pa na bumalik na sila dahil may mga lupang sakahan para sa kanila," pahayag ni Villarama.

Mula nang umupo si Pangulong Marcos, mayroong 1.38 milyong ektarya ng agricultural land ang nakahandang ipamigay. Namahagi na ang Pangulo ng 140,000 ektarya simula noong 2022.