Napilitan lumabas si Kingdom of Jesus Christ leader Pastor Apollo Quiboloy dahil malapit na ang Philippine National Police (PNP) sa kanyang pinagtataguan, ayon kay Pangulong Ferdinand Marcos Jr.

Ayon sa kampo ni Quiboloy, ang pastor ay sumuko sa militar. Pero sa panig ng PNP, inaresto si Quiboloy noong Linggo ng gabi.

“I think that’s a legal question. Pero ganito ang iniisip ko eh, hindi siya lilitaw kung hindi namin hinahabol ng husto,” sinabi ni Pangulong Marcos sa panayam sa sidelines ng Philippine Strategic Trade Management Summit sa Taguig City.

Paliwanag ng Pangulo, para masabing sumuko ang isang wanted na indibidwal, ito ay dapat dumaan sa police station, isang taga-usig, o anumang official authority sa paraan ng pagsuko.

"Hindi ganyan ‘yung nangyari, ang nangyari napilitan siyang lumabas kasi malapit na ang pulis sa kanya,” ayon kay Pangulong Marcos.

Sinabi ni Marcos na prinesenta ni Quiboloy ang kanyang sarili sa mga awtoridad para pigilan ang mga tagasuporta na nagbanta na magbuwis ng sariling buhay.

"To his credit, he was still displaying a modicum of leadership to his followers,” ayon sa Pangulo.

Matapos ang mahigit dalawang linggong pag-okupa at paghalughog ng PNP sa Kingdom of Jesus Christ (KOJC) compound sa Davao City, nilisan na rin ito ng libu-libong pulis.

Ayon sa legal counsel ng KOJC na si Atty. Israelito Torreon, boluntaryong sumuko si Quiboloy at apat na kapwa akusado na sina Ingrid Canada, Enteng Canada, Sylvia Cemanes, at Jackielyn Roy.

Taliwas ito sa sinabi ni Interior Secretary Benjamin Abalos Jr. na nahuli ng awtoridad si Quiboloy.

Ayon kay Torreon, piniling sumuko ng pastor dahil hindi na nito nakayanan ang paghihirap na dinaranas ng kanyang mga miyembro mula sa kamay ng mga kapulisan.

Iginiit ni Torreon na si Quiboloy ay hindi nanatili sa KOJC compound sa 16 araw na pagkubkob ng kapulisan.

Matatandaan na sinabi ng PNP na ang puganteng pastor ay nasa isang underground bunker sa loob ng KOJC compound.

Ayon kay Torreon, nagdesisyon si Quiboloy na sumuko sa Armed Forces of the Philippines dahil may tiwala siya sa mga ito.

Matapos sumuko ni Quiboloy at ng apat na iba pa niyang kasama ay agad na ibiniyahe mula Davao City patungo sa PNP Custodial Center sa Camp Crame, Quezon City.