Pinulong ni Pangulong Ferdinand Marcos Jr. ang mga pangunahing opisyal ng Executive Department para himayin at rebisahing mabuti ang panukalang 2025 national budget na nagkakahalaga ng P6.352 trillion.

Ayon sa Presidential Communications Office (PCO), kasama sa naturang pulong sina Executive Secretary Lucas Bersamin, Finance Secretary Ralph Recto, Budget Secretary Amenah Pangandaman, DPWH Secretary Manuel Bonoan, at NEDA Secretary Arsenio Balisacan.

Ang pagpupulong ay ginanap sa gitna ng ilang kwestiyonableng pagtapyas sa 2025 budget allocations sa mga pangunahing ahensya ng gobyerno, kabilang ang Department of Education (DepEd).

Paliwanag ng PCO, ang pagrerebisa ay upang matiyak na ang 2025 national budget ay “alignment with key development priorities.”

Ipinagpaliban ng Malakanyang ang nakatakda sanang paglagda ni Pangulong Marcos sa 2025 national budget sa Biyernes, Disyembre 20.

“The scheduled signing of the General Appropriations Act on December 20 will not push through to allow more time for a rigorous and exhaustive review of a measure that will determine the course of the nation for the next year,” ayon kay Executive Secretary Lucas Bersamin.

“The ongoing assessment is being led by the President himself, in consultation with the heads of major departments,” dagdag na pahayag ni Bersamin.

May ilang mambabatas ang nagpahayag ng pagkabahala sa budget cuts sa panukalang GAA, kabilang na ang P12 billion na tinapyas sa 2025 budget ng DepEd at ang zero subsidy para sa Philippine Health Insurance Corp.