Pinahintulutan ni Agriculture Secretary Francisco Tiu-Laurel Jr. ang pag-angkat ng 25,000 metriko tonelada ng frozen na isda, ilang araw matapos na ilabas ni Pangulong Marcos ang Administrative Order No.20 ang pagluluwag sa non-tariff barrier sa mga agricultural product.

Nilagdaan ni Tiu-Laurel ang Memorandum Order 17, na nagbigay ng mga alituntunin para sa pagpapalabas ng certificate of necessity para mag-import ng 25,000 MT ng frozen pelagic fish para sa mga wet market mula Oktubre 1 hanggang Disyembre 21, 2024.

Nakasaad sa memorandum na 80 porsiyento ng maximum importable volume (MIV) na may kabuuang 20,000 MT ay ibibigay sa mga rehistradong importer na kabilang sa commercial fishing sector.

Aniya, ang natitirang 20 porsiyento ng awtorisadong pag-aangkat na may kabuuang 5,000 metriko tonelada ay ilalaan sa mga asosasyon ng pangisdaan at kooperatiba.

Ang paunang volume na 112 MT, o katumbas ng apat na shipping container, ay ibibigay sa bawat kwalipikadong importer na kabilang sa commercial fishing sector, dagdag ng opisyal.

Ang mga sanitary at phytosanitary import clearance ay ibibigay mula Setyembre 1 hanggang Nobyembre 30. Dapat din dumating ang mga aangkating isda nang hindi lalampas sa Enero 15, 2025.

Dapat din iulat sa BFAR ang mga aangkating isda at kailangan i-trade ng mga importer ito agad upang matiyak na hindi magkakapatong-patong sa lokal na huli sa pagtatapos ng closed fishing season.

Idineklara ng BFAR na ang closed fishing season upang bigyang-daan ang panahon ng pangingitlog ng mga mature na sardinas mula Oktubre hanggang Enero.

Mas mababa sa 29 porsyento ang dami ng inangkat na isda ngayong taon kumpara sa 35,000 MT na inangkat noong 2023.