Patuloy ang accounting at inventory ng case folders ng mga pulis na may kinakaharap na kasong kriminal at administratibo.

Tiniyak ito ni Philippine National Police (PNP) Spokesperson Col. Jean Fajardo kasabay ng paglilinaw na walang nawawala na case folders ng mga pulis tulad ng unang rebelasyon kamakailan ni National Capital Regional Police Office (NCRPO) Director Brigadier General Jose Melencio Nartatez Jr.

Paglilinaw ni Fajardo, ang naunang pahayag ni Nartatez ay pagnanais na pabilisin ang proseso ng mga pulis sa Metro Manila na nahaharap sa mga kaso kung kaya hinahanap nito ang case folders.

Ayon kay Fajardo, maraming kaso na ang inapela o isinulong sa National Police Commission (Napolcom), PNP-Internal Affairs Services (PNP-IAS) at sa People's Law Enforcement Board (PLEB) at ang iba ay hawak na ng Department of the Interior and Local Government (DILG), Civil Service Commission at sa korte.

Inamin ni Fajardo na nababagalan si Nartatez sa usad ng mga kaso simula ng umupo bilang NCRPO Director at hindi kuntento na kahit sa mahigit 800 kaso na tinutukan ay nasa 300 kaso na ang naresolba.

May hinala si Fajardo na posibleng na `misplaced’ lang ang ilang case folders dahil ilang beses na naglipat ng tanggapan at nagpalit ng mga tauhan ang NCRPO.