Goodbye moonlighting.

Ito ang malungkot na balita ni Philippine National Police (PNP) Chief General Rommel Francisco Marbil sa mga pulis na ginagamit na oportunidad ang police escort bilang dagdag na pagkakakitaan.

Sa isang pahayag, opisyal na inihayag ni Marbil na tinanggal na ng PNP ang polisiya hinggil sa pagbibigay ng police security sa mga pribadong indibidwal, partikular sa mga mayayaman na tinaguriang very important person (VIP).

Ang internal policy adjustment ay sinimulang ipinatupad ni Marbil mula ng maluklok sa PNP noong April 1, at tuluyang inalis bunsod ng magkakasunod na pagkakadakip sa mga aktibong pulis na sangkot sa moonlighting activity.

Uminit ang usapin sa moonlighting activity ng PNP personnel ng madakip ang dalawang aktibong tauhan ng Special Action Force (SAF) na nakatalaga sa Zamboanga City subalit nabisto na nagsa sideline bilang police security ng isang mayamang negosyante sa Ayala-Alabang Village na exclusive subdivision sa Muntinlupa City.

“When I started po ng pag-upo bilang Chief PNP, pinabago po namin yung tema doon sa binibigyan po ng [Police Security and Protection Group] kasi it appears nagmo-moonlighting e,” pagsisiwalat ni Marbil.

Ayon kay Marbil, hindi trabaho ng mga pulis na magbigay ng proteksyon sa mga VIP dahil ang responsibilidad ng PNP ay ang seguridad at kaligtasan ng publiko.

“Ang nakalagay po doon VIP and hindi po trabaho ng pulis to give VIP protection to anybody. Hindi po trabaho yan, ang trabaho po namin is to give security to people na threatened sa buhay nila,” paliwanag ni Marbil.

Binigyang diin ni Marbil na ang dapat bigyan ng seguridad ng Police Security and Protection Group (PSPG) ay mga indibidwal na nahaharap sa mga banta sa buhay gayundin sa mga matataas na opisyal ng gobyerno.

Iginiit ni Marbil na hindi dapat nagbibigay ng police security sa mga mayayamang indibidwal na nagiging target ng krimen dahil sa kanilang estado ay may kakayahan na magbayad ng private security.

Inamin ni Marbil na masakit sa mata tingnan at hindi nakakatuwa na nakikita niyang police security ng mayamang indibidwal ang isang pulis.

“Hindi po ako natutuwa kasi last time I went to a hotel, this Chinese guy may security, ako nga wala e. Naka t-shirt pa ng PSPG. How can we do this? Ang mas masama lang doon taga-buhat lang ng bag,” paglalahad ni Marbil.