Ipinag-utos ni Pangulong Ferdinand Marcos Jr. sa Department of Budget and Management (DBM) na ibalik ang pondo para sa IT program ng Philippine National Police (PNP).

Sa press briefing sa Malakanyang, ibinahagi ni Interior and Local Government Secretary Juanito Victor “Jonvic” Remulla na ang pondo ay ilalaan para sa integrated 911 system ng bansa.

''So, as instructed by the President sa ating Budget Secretary ay iri-revert ang budget ng IT at tatanggalin iyong additional 500 million pesos intelligence fund na nilagay sa GAA. So, return to original budget ng 820 million yata ang nasa PNP, naging 1.3 billion – ibabalik na naman sa dati siya,'' pahayag ni Remulla.

Ayon sa Kalihim, nagkaroon ng budget cut ang iba't ibang PNP IT projects sa 2025 General Appropriations Act (GAA).

Kabilang dito ang Enhancement of the National Police Clearance System, na nabawasan ang budget mula sa P600 million sa National Expenditure Program (NEP) ay naging P232 million; pagtatatag ng Safe Camp Security System, mula sa P472 million ay naging P161 million; at PNP Drug-Related Data Integration and Generation System, mula sa P533 million ay naging P196 million.

Ayon kay Remulla, habang ang mga mahahalagang IT programs ay pinondohan, nasa P1 billion ang inilaan para sa pagkuha ng All-Terrain Amphibious Vehicles para sa Bicol Region, at karagdagang P500 million para sa intelligence fund ng PNP.

Bilang tugon, inatasan ni Pangulong Marcos si Budget Secretary Amenah Pangandaman na ibalik ang budget ng IT program ng PNP sa 'original amount' nito at alisin ang karagdagang P500 million na inilaan sa intelligence fund.

"The reversion of the budget cuts and the removal of the intelligence fund will free up funds, which will be reallocated to support the integration and enhancement of the 911 emergency hotline system," dagdag pa ng Kalihim.

Ayon sa DILG, ang karagdagang intelligence fund para sa PNP ay hindi tinalakay sa budget deliberations sa Kongreso.

“Dinagdag lang nila kaya nagtataka din kami kaya pinatanggal na rin," pagbabahagi ni Remulla.