Hindi na kailangan ang psychological evaluation upang patunayan at paniwalaan ng korte na nagkaroon ng pang-aabuso partikular ang paglabag sa Republic Act No. 9262 o ang Anti-Violence Against Women and Their Children (VAWC) Act.

Sa desisyon na pinonente ni Supreme Court Associate Justice Henri Jean Paul B. Inting na pinagtibay ng SC Third Division ang pagkakasala ni XXX270257 sa psychological violence laban sa kanyang asawa at mga anak.

Ang akusado ay sinampahan ng kasong pang-aapid, pag-abandona sa kanyang pamilya at hindi pagbibigay ng suportang pinansyal sa mga anak.

Hinatulan na guilty ng mababang korte ang akusado batay sa Section 5 (i) ng Anti-VAWC Act kung saan ang biktima ay isang babae at kanyang anak.

Nakasaad sa desisyon na ang asawang biktima ay nagkaroon ng pasaning mental at pagdadalamhati dahil sa kahihiyan sa publiko at hindi pagbibigay ng suportang pinansyal ng akusado.

Iginiit ng akusado sa argumento ang pangangailangan na patunayan ang elemento ng mental o emotional anguish ng biktima sa pamamagitan ng psychological report para mapatunayan ang psychological violence.

Hindi pinatulan ng SC ang argumento ng akusado at binigyan diin sa desisyon na “psychological evaluation from an expert witness is not necessary to prove psychological violence; the victim’s testimony is sufficient to prove emotional or mental suffering.”

“His wife’s detailed testimony in court proved her mental and emotional anguish. She recounted how he left their home to live with another woman right next door, fathered a child with her, and flaunted his affair on social media,” nakasaad sa desisyon ng SC.

Kulong na hanggang 8 taon ang inihatol ng korte sa akusado at pinagmulta ng P200,000, at inatasan na magbayad ng P75,000 bilang danyos.

Inatasan rin ng SC ang akusado na sumailalim sa psychological counseling at psychiatric treatment.