Lumabas ng lungga at ipagtanggol ang sarili sa korte.

Hamon ito ng Department of Justice (DOJ) kay Kingdom of Jesus Christ (KOJC) founder Pastor Apollo Quiboloy at hinikayat na lumabas ng lungga at harapin sa korte ang mga kasong kriminal na isinampa laban sa kanya.

Sa isang panayam, sinabi ni Justice Assistant Secretary at spokesperson Atty. Mico Clavano na binibigyan na ng Davao City Regional Trial Court at Pasig City RTC si Quiboloy na ipresenta ang sarili at isumite ang hawak na mga ebidensya at depensa hinggil sa kinakaharap na kaso.

"Sana humarap si Quiboloy sa korte upang doon niya ipaliwanag ang kanyang depensa pati na rin ang kanyang ebidensya para sa kanyang sarili," ayon kay Clavano.

Inaasahan ni Clavano na sa lalong madaling panahon ay magkakaroon na ng desisyon ang Supreme Court hinggil sa kanilang petisyon na ilipat sa Maynila ang pagdinig sa kaso ni Quiboloy.

Sakaling paboran ng korte ang petisyon ng DOJ, tiniyak ni Clavano na nakahanda ang prosekusyon sa gagawin na paglilitis kay Quiboloy dahil hawak na nila ang sapat na ebidensya para idiin sa kaso ang pastor.

Matatandaan na dalawang warrant of arrest na ang inilabas ng Pasig City at Davao City RTC matapos makitaan ng material evidence ang sexual abuse at walang piyansang kaso na qualified trafficking in person under Republic Act No. 9208, laban kay Quiboloy.