Inobliga ng doktor si Justice Secretary Jesus Crispin Remulla na magpahinga kaya mahigit isang buwan na nawala sa Department of Justice (DOJ).

Ito ang isiniwalat ni Remulla sa press briefing ngayong Biyernes kasabay ng paglilinaw na walang katotohanan ang kumalat na ulat sa social media na mayroon siyang sakit at inatake sa puso.

Ayon sa Kalihim, pinayuhan siya ng doktor na kailangan magpahinga upang mabilis na makarekober matapos sumalang sa bypass operation kamakailan.

Inamin ni Remulla na hindi kaila sa lahat na matapos siyang operahan ay agad na sumabak sa trabaho.

"And it takes its toll on my body," pag-amin ng kalihim.

Mariing pinabulaanan ni Remulla ang ulat na isinugod siya sa pagamutan at nakaratay sa intensive care unit.

Ibinida ni Remulla sa mga mamamahayag na kaya niyang tumayo sa loob ng apat na oras.

Ipinaliwanag ng kalihim na apat na buwan matapos operahan ay saka niya naisipan na magpasuri sa doctor para sa follow-up check-up.

Naniniwala si Remulla na ang kumalat na ay political propaganda ng mga desperadong indibidwal.