Tinanggal sa pwesto ng Supreme Court ang isang sheriff ng korte sa Olongapo City matapos na mapatunayan guilty sa kasong grave abuse of authority at gross insubordination bunsod ng pananakit sa babaeng litigante noong 2019.

Sa inilabas na per curiam decision, sinusugan ng SC ang natuklasan ng Judicial Integrity Board (JIB) na si Christopher T. Perez, Sheriff IV ng Branch 74, Regional Trial Court, Olongapo City, Zambales ay dapat parusahan sa pang-aabuso sa kanyang awtoridad at gross insubordination.

Ang kaso ni Perez ay nag-ugat sa reklamo ni Rodalyn Hanif noong November 26, 2019 dahil sinaktan siya ng Sheriff habang puwersahang ipinatutupad ang writ of execution na inilabas ng Municipal Trial Court in Cities (MTCC), Olongapo City.

Inilahad ni Hanif sa Reklamong Sinumpaang Salaysay na dalawang beses siyang sinuntok sa kanang braso ni Perez dahilan para mamaga ito.

Ang reklamo ni Hanif ay sinuportahan ng mga larawan sa pinangyarihan ng insidente habang ipinapatupad ang writ of execution, medico-legal certificate na inisyu ng James L. Gordon Memorial Hospital noong November 15, 2019.

Nakasaad sa medico legal certificate na kailangan ng medical attention ang mga pasa na tinamo ng biktima sa loob ng siyam na araw.

Noong March 2, 2020 ay naghaid si Perez ng motion for extension to file comment na inaprubahan ng Office of the Court Administrator, subalit nabigo ang Sheriff na isumite ang komento kahit binigyan ng 30-days extension na sagutin ang reklamo.

Dahil dito, inirekomenda ni Judicial Integrity Board (JIB) Acting Executive Director Atty. James D.V. Navarrete na parusahan si Perez ng Simple Misconduct and Insubordination.

Sinusugan ng SC ang rekomendasyon dahilan para masibak si Perez sa kanyang puwesto at pagmultahin ng P110,000.

“The Court thus imposed on Sheriff Perez the penalties of dismissal from the service for grave abuse of authority, and a fine of PHP 110,000 for gross insubordination, taking into consideration that this is the 10th administrative complaint filed against the Sheriff,” nakasaad sa desisyon ng Korte.