Good news para sa mga overseas Filipino workers sa Taiwan, dahil inanunsiyo ng Taiwan government na kasama ang mga OFWs sa makaka-benepisyo ng bago nilang ipatutupad na Minimum Wage Law.

Ibig sabihin ay itataas ang tinatanggap na minimum na sweldo ng mga manggagawa sa Taiwan kasama ang mga OFWs.

Epektibo sa unang araw ng 2024 (January 1), mula sa kasalukuyang sahod na NT$26,400 o P44,800 magiging NT$27,470 o P46,699 ang tatanggapin ng mga Pinoy workers.

Ang bagong minimum wage law, ay nilagdaan ng 21 member committee kabilang ang Ministry of Labor. Ayon sa batas, dapat i-review ng committee tuwing ika-tatlong quarter ng bawat taon ang sweldo ng mga manggagawa at magrekomenda kung kinakailangan ng wage adjustments.

Ang pagtaas ng minimum na sweldo ay depende sa: Consumer price index, per capita income, gross domestic product growth, minimum living expense, ayon sa bagong minimum wage law ng Taiwan.

Ayon sa batas, pagmumultahin ang mga hindi susunod sa bagong wage adjustment, papatawan ng multa ng NT$ 1.5 million o P2.9 million.

Ikinatuwa naman ni MECO chairman at dating Labor Secretary Silvestre Bello III ang inisyatiba na ito ng Taiwan government.

“Our OFWs in Taiwan will enjoy a good start of the new year with their wages being increased. We laud the initiative and good gesture of the Taiwanese government that benefit all workers, including our OFWs in Taiwan,” pahayag ni MECO chairman Silvestre Bello III.

Nasa 123,768 Pinoy factory workers ang makikinabang sa minimum wage law, maging ang mga na-hire hanggang Disyembre 31, 2023.