Idineklara ni Pangulong Ferdinand Marcos Jr. ang suspensyon ng trabaho sa Executive Branch mula 3:00 ng hapon sa Lunes, Setyembre 23, bilang paggunita sa ika-32 National Family Week at Kainang Pamilya Mahalaga Day.

Nakapaloob ito sa Memorandum Circular (MC) 64, na nilagdaan ni Executive Secretary Lucas Bersamin noong Setyembre 12.

Kinilala ng MC 64 ang pangangailangan para sa mga empleyado ng gobyerno na magdiwang kasama ang kanilang pamilya sa National Family Week at Kainang Pamilya Mahalaga Day.

“This Office also encourages all government workers in the Executive branch to fully support the programs and activities relative to the observance of Family Week, as organized by the National Committee on the Filipino Family,” nakasaad sa MC.

Hinimok ng MC ang suspensyon sa trabaho sa lahat ng sangay ng gobyerno, independent commissions o bodies, at pribadong sektor para magkaroon ang mga pamilyang Pilipino ng ganap na oportunidad para ipagdiwang ang ika-32 National Family Week.

Inatasan ng MC ang lahat ng ahensya na ang trabaho ay may kinalaman sa basic at health services, preparedness, pagtugon sa mga sakuna at kalamidad at pagganap sa iba pang mahalagang serbisyo na ipagpatuloy ang operasyon at magbigay ng kinakailangang serbisyo.

Noong 1992, inilabas ang Proclamation 60 na nagdedeklara ng Family Week sa huling linggo ng Setyembre ng bawat taon.

Ang Kainang Pamilya Mahalaga Day naman ay idinaraos tuwing ika-apat na Lunes ng Setyembre ng bawat taon, sa bisa ng Proclamation 326 na inilabas noong 2012.

Layon ng National Family Week na palakasin at isulong ang pagkakaisa, katatagan at pananatili ng Pamilyang Pilipino bilang pangunahing bahagi ng 'Filipino society.'

Ang Kainang Pamilya Mahalaga Day ay ipinagdiriwang kada taon upang bigyang-diin ang kahalagahan ng Pamilyang Pilipino na nagsasalo-salo sa pagkain bilang national tradition.

Samantala, ang National Committee on the Filipino Family, na may mandato na itaguyod ang pamilya bilang pundasyon ng bansa, ang nangangasiwa sa pambansang pagdiriwang ng Kainang Pamilya Mahalaga Day.