Hindi na pinapayagang gamitin ng Makati City Government ang yellow card ng mga residente ng 10 barangay na inilipat mula Makati City sa Taguig City na dati ay nagbigay sa kanila ng government-subsidized health care.

Inihayag ng Pamahalaang Lungsod ng Makati noong Lunes na alinsunod sa desisyon ng Korte Suprema, ang mga yellow card na naka-address sa 10 EMBO barangay ay wala ng bisa simula Enero 1, 2024, maliban kung sila ay mga empleyado ng Pamahalaang Lungsod ng Makati.

Sinabi ng Makati na nag-expire na rin ang mga lisensya para mag-operate ng mga health center at lying-in sa mga barangay ng EMBO (Enlisted Men's Barrio), kaya kailangan na ring isara.

Dati, hindi sinisingil ang mga pasyente ng yellow card sa Ospital ng Makati na may kabuuang bayarin sa ospital na aabot sa P5,000 pababa.

Samantala, ang mga may bayarin sa ospital na lampas sa P5,000, ay sinisingil lamang ng unipormeng rate na P500, kahit umabot sa anim o pitong digit ang halaga.

Ang mga cardholder ay binigyan din ng access sa mga libreng gamot, kabilang ang mga maintenance na gamot para sa hypertension, diabetes, at iba pang sakit.

Dahil dito, ilang residente ang nagpahayag ng kanilang pagkadismaya sa pagkawala ng mga benepisyo na kanilang natatanggap noon mula sa lokal na pamahalaan ng Makati City.