MIF HINDI DAPAT I-EXEMPT SA TAX POLICY

Published Feb 04, 2023 07:19 PM by: NET25 News|📷 SENATE OF THE PH FB

Dapat lang na hindi bigyan ng tax exemption ang Maharlika Investment Fund (MIF). Ito ang payo ni Senator Francis "Chiz" Escudero sa pamahalaan at sinabihan na panindigan ang "no tax exemption policy" lalo na sa isinusulong na Maharlika Investment Fund (MIF) Bill. Kaugnay ito sa pagkwestyon ni Escudero sa paglibre sa kontrobersyal na sovereign wealth fund mula sa pagbabayad ng national at local tax. Sa ilalim ng panukala, ine-exempt sa pagbabayad ng buwis at hindi rin nasakop sa Governance Commission for Government-owned and controlled corporations (GCG), sa Government Reform Procurement Reform Law at sa Salary Standardization Law ang MIF. Maging ang importasyon ng supplies at equipment ng MIF at ng niluluto na Maharlika Investment Corporation (MIC) ay ililibre rin sa customs duties alinsunod sa Customs Modernization and Tariff Act. Punto pa ni Escudero, bahagi ng polisiya ng nakaraang administrasyon ang hindi pagbibigay ng tax exemption na dapat panindigan ng mga economic managers ngayon lalo ang kalihim ng Budget Department na si Sec. Amenah Pangandaman at si Finance Secretary Benjamin Diokno ay parehong bahagi ng Duterte administration. Tinawag pa ng senador na "bad policy" ang pagbibigay ng maraming exemptions. Dagdag pa ni Escudero, kung ang Land Bank of the Philippines (LBP) at Development Bank of the Philippines (DBP) na major contributors ng sovereign wealth fund ay nagbabayad ng buwis kasama ang ibang korporasyon bakit nga naman bibigyan ng perks na tax exemption ang Maharlika corporation.